KULTURA TURISMU BA DEZENVOLVIMENTU KOMUNITARIU IHA TIMOR LESTE

 DEZENVOLVIMENTU KOMUNITARIU IHA TIMOR LESTE

Edit : Mali Aisur

Email  :  aderitodasilvanine@gmail.com

KULTURA TURISMU BA DEZENVOLVIMENTU KOMUNITARIU IHA TIMOR LESTE

  

      I.            INTRODUSAUN

Hamutuk ho kompromisu entre estudante ho dosenteh hodi hala’o prosesu apriende kolektiva ida ne’e ho meus atu antende sobre buat ruma ne’ebe eziste, dala uluk sublina deit katak ema sira be eziste iha mundu ne’e ohin loron esforsu no  buka atu hatene konaba fenomena sosial hirak ne’ebe mak sai interesante ba nesesidade ema nian tantu sosiedade akademiku nomos ba sosiedade naun akademiku sira, tanba ne’e antes atu tama iha kontiudu importante seluk, tuir mai ita ba dekreve uluk lai em termus turismo no dezenvolvimentu? Agora, Turismu nudar atividade ema nian hodi tama sai husi fatin ida ba fatin seluk ho objektivu atu hatene no konese fenomena sosial sira be eziste iha rai laran ka rai liur.

Bazeia ba pensamentu iha leten, sita mos matenek na’in balun nia hanoin sobre turismo; tuir Prof. Salah Wahab, “Turismu mak atividade ema nian hodi hala’o ho konsiensia, ne’ebe hetan atendementu no substitui entre ema lokal no estranzeiru husi ambiente ida ou nasaun ka Kontinente ida ba kontinente seluk hodi hela tempu provizoriu ba buka kontente (Husi fontes; Pengantar Ilmu Pariwisata, Drs. H. Oka A. Yoeti, MBA, 1996. Hal. 116). No Dezenvolvimentu hanesan tranformasaun ida ne’ebe mak akontese ho multidimesional katak mudansa iha aspeitu hotu-hotu, hare husi vida moris komunidade nian, ekonomia, sosial, kultura, infrastruktura, politika, defeza, no teknolozia (Alexander 1994).

Entaun konklui katak, Planu dezenvolvimentu ne’e prosesu mudansa ba aspeitu hotu-hotu ne’ebe maka liu husi ema ni-nia badinas no planu ne’ebe ke diak ba povu nia bem estar. Husi ida ne’e, konstrui hanoin ida sobre dezenvolvimentu ne’e importante liu mak progresu no kresimentu ne’e eziste, ida ne’e maka kondisaun no situasaun ida ke merese duni ita konsidera hanesan dezenvolvimentu tanba melhora vida moris komunidade nian iha dimensaun hotu-hotu. Ho nune’e, jeralmente dezenvolvimentu ne’e nudar kompromete ida atu halo mudansa  ba buat ruma ne’ebe importante no benefisiu mos ba populasaun sira iha ambiente ida tantu hare husi dezenvolvimentu fiziku no naun-fiziku, prefere ba ita nia nasaun foun ida ne’e hafoin ita ukun iha tinan 2002 liu husi rekonesementu internasional iha suportasaun nasoens unidas nian iha tempu ne’eba no sira nia asistensia masimu mos ba ita nia governante sira atu aselera dezenvolvimentu iha seitor hotu-hotu hanesan; sistema administrasaun publika ni-nian, infra-estrutura baziku no iha area kapasitasaun umana Ex; edukasaun formal no naun-formal.

Enkuantu ita ko’alia konaba dezenvolvimentu turismo iha kontestu nasaun Timor Leste nian tenki iha korazen ne’ebe diak no los husi ukun na’in sira li-liu ba ministeriu kompetente sira, se ita hakarak area turismo ne’e atu moris no sai bo’ot iha future maka halo sensibilizasaun ba komunidade.

Agora, kestaun maka turismo ne’e iha variedade ezemplu hanesan bazeia ba objetu turismo mak; turismo kultural, turismo komersial, turismo politika, desportu, turismu social no turismo saude (H. Oka A. Yoeti, MBA, 1996, Hal. 123-124).

Razaun sira iha leten ne’e prefere liu ba nasaun dezenvolvidu no avansadu sira  maibe virtualidade  iha kontestu nasaun ita nian kuandu ita hakarak atinze to’o iha ne’eba ita presija hanoin kostruktivu husi komunidade, sosiedade sivil Ex: ONG sira, no li-liu estadu ho governu maka hola pozisaun ho meus partisipativu.  Tanba ne’e mak ita nia governante sira iha hanoin insentiva ida  liu husi planu asaun hanesan programa V Governu Konstitusional iha Planu Estrateziku Dezenvolvimentu Nasional (PEDN) nian alarga hela kestaun turismu oinsa atu dezenvolve diak, iha parte seluk Turismu nudar fator importante tebes ba dezenvolvimentu Timor-Leste tan ne'e mak ita akompanha informasaun liu husi media masa televizaun, jornais, no radiu katak SEPFOPE ho Ministeiru Turismu atu dezenvolve uluk turismu Be'e Manas Marobo-Distritu Bobonaro, Mota Bandeira, Sub-Distritu Atsabe, Distritu Ermera, Lagua Sloi Kraik- Aileu no Tasi Ibun Tutuala no fatin seluk tan. Zona turistikus hirak ne’e SEPFOPE ho Ministeriu Turismo iha planu ona sei dezenvolve iha futuru maibe, ne’e planu ida, governu seidauk dezenvolve fatin ida sai evidensia ba povu, tansa no oinsa mak ko’alia deit nune’e? maibe ita hare liu ba iha seitor privadu sira deit maka ohin loron investe modalidade iha hari’i apartamentu, otelaria, restaurante bo’ot sira iha Dili laran.

 bazeia ba inisiativa hirak mensiona ne’e ho prespektiva ida katak seitor turismu mos nudar industria ida ne’ebe hamri’ik ho nia importansia ba aumenta rendimentu tanba liu husi persepsaun balun ba iha agensia de viagem hirak ne’ebe mak hala’o husi Timoroan balun mak ita nota hanesan ezemplu agensia de viagem Jaco Group Lda iha Lecidere-Dili ho sira nia atividade ajensia ida halo viazen hodi fasilita transportasaun  ba turista sira no seluk fali mak Burira Lda agensia de Maritima iha Land Mark-Plaza Fatuhada Comoro no mos hanesan Timor Tour and Travel Lda, na-na’in ba ajensia ne’e husi nasaun Indonesia nian ne’e katak liu husi turismo komersial ne’e sai mata dalan mos ita nia Estadu iha prosesu, maibe husi kresimentu seitor turismu iha nasaun nurak ida ne’e  ho hanoin ida ita seidauk benefisia ho adekuadu signifika ita ladauk konsidera katak iha esperansa bo’ot ba ita iha tempu badak nia laran, tanba kauza ida maka hanesan problema turismu ne’e assuntu eh termu foun ida ba komunidade razaun maka membru komunidade maioria maka seidauk kompriende konaba konseitu turismu iha Timor Leste katak tuir persepsaun jeral ba situasaun iha rai laran. Nune’e mos turismu nudar seitor holistiku ida ba kontribuisaun dezenvolvimentu nasional no bele kria kampo servisu no empregu ba komunidade sira, ita hare faktus balun ne’ebe sai evidensia forte hanesan fatin Pousada Baucau, pousada Maubisse nia dirijente ne’e ema Timoroan mak ka’er ne’e serteza ke rendimentu tama no emprega ema Timoroan sira bele servisu hodi atende turista sira ne’ebe mak halo viazen liu husi agensia viagem ne’ebe naktemi ona iha leten no turista hirak ne’e aluga fatin, nune’e husi rendimentu ne’e bele fo impostu mos ba estadu, entaun ne’e kontribuisaun ida ba dezenvolvimentu ekonomia. Turismu iha parte ida atu introduz arte de kultura no natureza furak ba emar sira iha mundu li-liu iha rejiaun eh nasaun ida, inkluindu atu konese hodi fo adubu ba sentimentu hadomi nia rai no unifika ema nia-an ho natureza, importante liu ba ema. Alende progressu housi korrente estranzeiru sira ne’ebe mai iha nasaun ida hanesan Timor Leste iha loron ba semana, fulan ba tinan hatudu nia kuantidade sa’e katak ema liur sira mai liu husi parte terrestre, portu no aeroportu sira, mesmu ita hare’e ni-nian persentazen la dun bo’ot maibe ita nota katak indikasaun ida ne’e sai mos ba esperansa ne’ebe diak ba futuru.  Ita nian Nasaun ki’ik ida ne’e prespektiva husi potensialidade ne’ebe eziste, iha potensia bo’ot teb-tebes ba fatin turismu nian hanesan ezemplu iha distritu Lautem-Com, Meti Aut-Dili, Maubisse, Bobonaro-Marobo, Ainaro- Ramelau ho fatin seluk tan ne’ebe eziste iha distritu 13 nudar fatin turistiku be importante no interesante bo’ot teb-tebes ba turista lokal no internasional sira atu ba vizita fatin refere.

Istorikamente, “Liafuan ida hala’o viazen “Perjalanan” ne’e, ema ou nasaun ne’ebe ke primeiru hala’o viazen maka ema Romanu sira ho objetivu atu haksolok sira-an eh kontente, iha lian ingles dehan Travel for Pleasure, entaun iha momentu ida ne’eba ema Romanu sira hala’o tiha ona Travel “Tour” ba dala mil atus ba atus ho sira nia kareta kuda atu hare’e ; templu (candi-candi) sira, piramide sira ne’ebe mak eziptu antiga sira husik hela iha rai Romanu. Iha fatin seluk hanesan rai Gresia/Gregu sira mos konsidera nudar objetivu Tour “Wisata” mak konesidu iha tempu ne’eba. Ema Romanu sira kuandu ba hala’o travel iha rai Gresia/Gregu (Yunani) atu hare’e kompetisaun desportu olimpiku inklui sira mos buka fontes Be’e Manas ba objetivu saude, hare’e mos atrasaun arte povu Gregu sira nian, Festival besik ba sira iha fatin ne’ebe toba eh hela. Wainhira tama ona iha era destroisaun reinu Romanu iha sekulu V nudar dezastre ba mundu turista sira hala’o meus atu hakontente sira nia-an, entaun durante tempu nakukun ida ne’e ema hirak ne’ebe ho lisan aventura (Petualangan) deit maka bele hala’o Tour eh la’o ba fatin-fatin sira, tanba perigoju nia laran katak traveller sira se’es-an  husi ema sira ne’ebe mak sai inimigu ba patrullamentu militar reinu Romanu sira, tan ne’e iha momentu ida ne’e mos assosiasaun sira bain-bain hala’o viazen/travel “Perjalanan” ba fatin turismu hanesan organizasaun sira be eziste iha tempu ida agora”. (husi Fontes; Pengantar Ilmu Pariwisata, Drs. H. Oka A. Yoeti, MBA, 1996, Hal.3-4).

Depois de iha fenomena ida ne’e hafoin tempu Governasaun liurai Elizabeth I maka jerasaun ningrat sira housi nasaun Inglatera organiza viazen “Perjalanan” ba kontinente Europeia ho objetivu atu buka ideas foun (Ide-ide Baru), apriende arte kultura, sistema governasaun, hanoin eh ideias husi nasaun sira seluk. Viazen turista sira nian iha fali sekulu ba dasanolu resin ualu (Abad Ke-18) maka sira hala’o fali, esensial liu ba vizita eh buka fontes Be’e Manas (SPA) ne’ebe jerasaun Ningrat husi Inglaterra sira ho kontinente Europeia hala’o. Buat hirak ne’e ita konsidera hanesan metodu viazen ida ne’ebe ke, inisia ema Romanu sira hala’o tiha antes, atu dehan deit katak iha vizitasaun Jerasaun Ningrat Inglaterra nian iha momentu ne’e la’os deit ba Hari’is Be Manas, maibe atu hare’e mos fenomena kultura ne’ebe ho lisan tradisionais, kompetisaun desportus, kasa animal fuik sira, tebe tradisionais, no hare’e mos jogatina (Perjudian) ne’ebe disponivel husi ema lokal. Tuir mai mak sira kontente eh haksolok hodi hari’is tasi, ikus mai konesidu katak hari’is tasi diak liu duke hari’is iha fontes Be’e Manas.

Beleza natural, kultura no istoria Timor-Leste nian hamutuk, maka sei halo turismu nudar seitor industrial ida, ne’ebe uniku, no mos hanesan meiu importante ida, ba ita nia dezenvolvimentu ekonomiku. Seitor turismu ida ke diak liu, maka sei hamosu empregu, afirma ita nia istoria no sei kria negosiu. Tamba seitor turismu, foin maka atu haburas-an, Governu sei buka kedas atu tau Timor-Leste, estrateziku, hanesan lider rejional, iha merkadu, ne’ebe hare’e liu ba turismu ekolojiku ne’e tuir planeamentu estadu ni-nian. Governo sei fasilita kresimentu iha industria turismu, liu husi rehabilitasaun infra-estrutura, inklui aeroportu Dili, telekomunikasoens no estrada iha rotas turistika prinsipais balun, ho destake ba estrada boot iha kosta-norte, husi Kom to'o Balibo. Iha V Governu Konstitusional Governo sei hari’i iha Dili, Sentru formasaun ba Turismu ho Hotelaria. Sei estabelese mos Sentru Informasaun Turistika iha rai ulun to’o rai ikun. Iha mandatu V Governu Konstitusional sei alarga ita-nia aktividades atu halo promosaun ita nia turismu ba nivel internasional, inklui atu hatudu lolos ita nia eventus espesiais no ita nia atrasaun. Ne’e sei inklui provizaun pakotes ki'ik ba viajen sira, ne’ebe sei hetan promosaun iha sentru turistiku, hanesan Darwin no Bali, no mos ba rejiaun Asia-Pasfiku, agora tanba sa mak ema iha intereses bo’ot tebes hodi hala’o be atividade viazen ne’e? Ita fo ezemplu konkretu no simples liu hanesan; hatudu realidade husi promove Turismu maka'as liu tan ho realizasaun “Festival Karavana Nasional”, foin lalais ita halo iha Dili laran hamutuk, antes implementa Ximeira CPLP ne’ebe mak liu dadauk ne’e hodi amostra komunidades no ita nia pontos atraksaun turistika. Eventus internasionais sira ne’e, la’os deit lori turistas mai Timor-Leste, maibe mos serve atu foti ita-nia pais nia perfil, iha nivel internasional tan ne’e, maka ita sei hametin no divulga liu tan eventus importantes sira hanesan ne’e iha futuru.

 

   II.            OBJETIVU

Husi prosesu apriende no hakerek servisu individu ida ne’e nia objektivu hanesan tuir mai;

1. Atu orienta Estudante sira hodi kompriende konaba intereses viazen traveller iha kontestu turismu komunitariu.
2. Atu nune’e Estudante sira iha konesementu klean sobre motivasaun Traveller iha hala’o atividade viazen husi fatin ida ba fali fatin seluk.

3.      Atu justifika motivasaun traveller nian iha hala’o atividade tour ba importansia dezenvolvimentu komunitariu.

III.            DISKUSAUN NO ANALIZA

1. Viazen  Traveller

Etimoloziamente, sobre konseitu turismu dala uluk ita ba hatene uluk lai termu turismu, observasaun tuir lian Indonesia nian iha palavra baziku maka hanesan “Wisata” katak “Perjalanan”, “Pariwisata” katak perjalanan yang di dilakukan dari suatu tempat ke tempat lain, “Wisatawan” katak orang yang melakukan perjalanan, no “Para wisatawan” katak orang-orang yang melakukan perjalanan, iha lian Ingles iha palavra baziku maka “Tour” hanesan “Tourism=travel”, Portugues “Turismo”, iha lian Tetum “Turismu” signifika “Viazen”, jeralmente, turismu katak atividade viazen ne’ebe mak hala’o hodi hadulas housi fatin ida ba fatin seluk. Agora emar sira ne’ebe mak hala’o atividade viazen refere ita bolu dehan “Turista” iha lian Ingles katak  “Traveller/Travellers”, nune’e liafuan ida Traveller ne’e mai husi travel.

H. Oka A. Yoeti, iha nia livru haktuir katak, Tuir matenek nain Hermann V. Schulalard, ekonomista ida husi nasaun Austria, iha tinan 1910 fo definisaun konaba Turismu mak; “Tourism is the sum of operations, mainly of an economic nature, which direcly related to the entry, stay and movement of foreigner inside certainly country, city or region”. (Husi fontes : Pengantar Ilmu Pariwisata, Drs. H. Oka A. Yoeti, MBA, 1996:114).

Tuir peritu ne’e nia hanoin sobre “Turismu katak; totallidade atividade hotu ne’ebe la’o,  esensial liu iha ligasaun ho natureza ekonomia, ne’ebe direitamente iha relasaun ho nia rendimentu, hela no movimentu housi ema liur serteza tama sai iha nasaun, sidade eh rejiaun”.

Bazeia ba matenek na’in ida ne’e nia hanoin konaba turismu mak nakait ho aspeitu ekonomia tanba fo definisaun housi peritu ekonomista ida, tan ne’e fo presaun liu ba aspeitu ekonomia, atividade hotu la’o tanba sentraliza iha natureza ekonomia ni-nian, ne’ebe naturalmente atividade ne’e la’o utiliza material sira ho karakteristiku ekonomiku, .

Alende hanoin seluk mos eziste hanesan H. Oka A. Yoeti, MBA iha nia livru haktuir katak, tuir matenek nain rua hanesan Prof. Hunzieker ho prof. K. Krapt (1942) fo definisaun konaba “Tourism is the totally of the relationship and phenomena arising from the travel and stay of strangers (Ortsfremde), provide the stay does not imply the establishment of a permanent resident”.

Turismu Katak; Totalidade housi familia no fonemena ne’ebe hamosu husi viazen no disponivel ba ema estranzeirus hela provizoriu, maibe la’os direitamente forma rezidensia hela permanente ida.

Bazeia ba matenek na’in rua nia hanoin iha leten, hakerek na’in rejumu ba sira nia hanoin katak iha viazen refere la signifika atu hela estatiku iha fatin sira be ema halo viazen ba ne’e, tanba ne’e ho ita nia konsiensia tomak atu anima ita-an durante ita nia ezistensia iha fatin ne’e ho tempu badak deit.

2. Dezenvolvimentu Komunitariu

Dezenvolvimentu ba rekursu ema ne’e nudar fator determinante ne’ebe esensial ida  ba nasaun foun sira hanesan Timor Leste tanba empoderiza (Empowerment) ema hodi hasa’e intelegensia ida ne’e signifika katak paradigma dezenvolvimentu ida ke hatu’ur komunidade sira nudar tarzeitu nune’e  iha final bele alkansa no dominasaun iha rekursu umanu no bele atinze moris rohan la’ek wainhira liu husi edukasaun formadu no naun formadu sira,  partisipasaun ativa ho direitamente, wainhira akontese buat sira ne’e mak ita firmeza katak dezenvolvimentu aspeitu turismo ne’e sei la’o ho susesu iha futuru no bele mos esperansa bo’ot ida. Argumenta katak ema nudar abut ba buat hotu-hotu. Alende iha finalidade husi hakbi’it ne’e ho objetivu ida hodi ema ne’e bele dezenvolve diak liu ba asuntu hirak be justifika ona iha leten.

3. Motivasaun Traveller Iha Timor Leste.

Fenomena ne’ebe sempre mosu iha emar sira nia hanoin eh ideias ida husi atividade viazen ne’e tanba iha objektivu fundamentu ida ke signifikativu tebes relasiona ho inisiativa atu hakontente ema nia vida moris hodi pasa ferias ba iha fatin ruma, ezemplu hanesan iha ligasaun ho situasaun real husi aspeitu edukasaun talves mos estudante ba peskiza iha fatin balun bazeia ba objetu ne’ebe maka sira hili eh foti no sai tarjeitu, aspeitu relijiaun mak nakait ba iha atividade meditasaun eh talvez pregrinasaun ba fatin lulik sira ne’ebe maka foin hahu iha fatin sagradu ruma sai nesesidade importantes ba ema atu hala’o atividade vizita, buat rua ne’e tuir interpretasaun global eziste duni iha nasaun ida ne’e. Maibe, em termus atividade viazen iha ita nia rai laran ida ne’e tuir observasaun jeral katak dala barak mos akontese realidade ida hanesan maioria komunidade sira iha area rurais tantu iha sidade ladun tau importansia ba iha atividade turismu ni-nian, mesmu minoria husi komunidade sira hala’o ona atividade refere oinsa atu buka hanoin komfortabel, atu hetan prespektiva foun ruma iha vida moris lor-loron nian, psikoloziamente ita ema moris presiza atu halo relaksa ba ita nia-an signifika atu halo sentimentu ne’ebe hamri’ik hikas husi ita nia moris no hanoin estatiku no ita mos presiza sai husi ambiente ne’ebe mak ita eziste ne’e rasik atu bele priense ita nia hanoin foun inkluindu atu hakompleta ita nia nesesidade moris umana. Husi buat hotu ne’e mak ita konsidera hanesan motivasaun ida ke forte no sai nudar fundasaun ida ba iha ita nia ezistensia iha mundu ou iha ambiente natureza ne’e rasik. Alende ne’e, husi elementu importante iha prosesu atividade viazen hotu-hotu ne’e ita bele halo, serteza ke ita fa’an rendimentu ne’ebe tama ou hetan no fo tempu tomak ba atividade pasa ferias signifika ita gastu mos ita nia osan lubuk no lakon mos tempu barak, hanoin ida ne’e mos nudar motivasaun hodi enkoraja ita atu hala’o buat hirak ne’e ho razaun ida katak inisitiva atu organiza ba atividade viazen relasiona ho psikoloziku no foti asaun ida hodi husik hela ita nia rezidensia ho provizoriumente, hare’e ba argumentu hirak ne’ebe mensiona iha leten sai mos baze fundamentu ida ba ita. Agora iha prinsipiu ida husi atividade hala’o viazen, marka prezensa turista sira nian iha ne’eba la’os atu hetan rendimentu ruma eh osan ruma, maibe ho turista sira nian komitiva iha ambiente turismu ne’e atu hare’e fenomena sosial ne’ebe diferente ho traveller sira nian ne’e rasik, nomos hela ho provizoriu durante loron sorin deit, la’os permanente, liga ho hanoin ida ne’e maka ita sita Drs. H. Oka A. Yoeti, MBA, nia teoria “katak oinsa atu hare’e konaba ema lokal sira halo servisu iha sira nia moris lor-loron ne’e, progresu saida mak sira atinze ona, oinsa atu hare’e konaba fatin istoriku hanesan monumentu sira,.......(Drs. H. Oka A. Yoeti, MBA, 1996 Hal.82)

Bazeia ba hanoin hirak iha leten, liga ho ita nia realidade moris, Timor oan sira barak mak ohin loron hasoru dezafius hodi la partisipa nudar vida turista, wainhira ita koa’lia konaba turismu; atu justifika deit ho liafuan simples hanesan;

1. Iha area Rurais; Ema Timor oan ne’ebe eziste iha ne’eba, wainhira komesa tama ona iha tempu bai loron housi fulan Junhu to’o fulan Outobru kada tinan sira sempre preukupadu ho nesesidade halo atividade kultural maka sai importante liu duke ba hare’e aspeitu seluk hanesan ba vizita fatin turistiku, rekreasaun, entaun ho oportunidade preukupadu ba halo meius kultura ida ne’e rendimentu eh osan hirak ne’ebe mak sira hetan durante iha esforsu tomak sei gastu hotu ba atividade halo lia mate no lia moris, fetosan umane, hafolin no seluk tan. Los duni, ita konsidera nafatin komunidade rural sira nia hanoin hala’o atividade refere nudar atividade ida hola parte iha dezenvolve turismu kultural tanba sistema ida ne’e mos ita tau pozisaun ida nudar konseitu turismu arte no kultura maibe presiza mos atu ita halo mos atividade seluk husi ida ne’e, atu nune’e ita bele transforma ideias klasiku ba moderna no koko atu moris iha situasaun no kondisaun ida ke kapa’as no furak liu. Agora;
2. Iha area urbana; Ita koa’lia iha pontu ida ne’e iha diferensa uituan ho hanoin iha leten tanba persepsaun husi realidade ne’ebe iha, ema balun ho nia familia uma laran iha interese bo’ot teb-tebes hodi halo atividade vizita fatin turistiku sira hanesan iha Meti-aut, Kristu Rei, Behau, Liquisa, Tasi-Tolu ho fatin sira seluk, hodi utiliza tempu ba hari’is iha tasi hanoin ida ne’e ita prefere ba populasaun sira ne’ebe mak hela iha Kapital Dili laran, mesmu la maioria halo maibe minoria sei hola parte iha fenomena refere. Iha dalen seluk, konsidera hanesan partisipasaun emar sira nia iha fenomena tour ne’e iha eziste duni. Iha kapital Dili tuir observasaun global ne’e atividade viazen ba fatin turistiku la’os deit ema lokal maibe ema estranzeiru be mai husi rai liur halo viazen ba fatin hirak ne’e, balun ba hari’is tasi ho sira nia familia, halo atividade desportu (Olah Raga),

Iha argumentu hirak ne’ebe temi ona iha leten, ita sita mos matenek na’in ida seluk nia hanoin hanesan Suwantoro (Fontes husi; http/www.google.com), Menurut Suwantoro (1997; 17),  nian hanoin konaba fatores ne’ebe motiva turista sira halo atividade viazen;

      Dauluk ; Motivasaun ba nesesidade atu passa ferias no rekreasaun

      Daruak ; Motivasaun ba Nesesidade edukasaun no Peskiza

      Datoluk ; Motivasaun ba nesesidade sobre relijiaun

      Daha’at; Motivasaun ba Nesesidade saude

      Dalima ; Motivasaun ba Interese  kultura no arte nian.

      Dane’en ; Motivasaun ba Importansia Seguransa

      Dahitu ; Motivasaun ba importansia relasaun familia.

      Daualu; Motivasaun ba Importansia politika.

Konklui katak hosi motivasaun hirak ne’e maka inpulsiona turista sira ba hala’o atividade refere ba iha area potensial sira entaun sei hamosu moris diak populasaun sira be bes-besik ba fatin importante ne’e, nomos atu hamosu moris ne’ebe mak prosperu iha futuru. Tanba ita foti hanoin ida katak nakait ba iha Suwantoro nia ideias ualu ne’e nudar aspeitu importante tebes, em termus seitor turismu nian iha nasaun ida vantazen ba dezenvolvimentu umana hodi kontribui ba iha dezenvolvimentu iha balansu.

4. Viazen Iha Importansia Ba Dezenvolvimentu Komunitariu.

Atividade viazen ne’e integra ona ba iha turista sira nia hanoin bele fo kontribuisaun meus dezenvolvimentu ida, atu nune’e ba futuru komunidade sira bele dezenvolve area hirak ne’ebe mak sai potensia bo’ot iha domestiku nasaun eh rejiaun ida nian. Motivasaun husi ema ne’ebe mak hala’o viazen hanesan iha parte ida atu hamoris moralidade ne’ebe sai modalidade iha sosiadade laran hodi konstrui fatin holistiku iha meus sistema moris komunidade nian husi tradisional ba vida moderna, dezenvolvimentu estrutura sosiadade fo influensia dinamika moris komunidade sira nian ho fatores oi-oin tantu housi internal ou esternal housi komunidade ne’e rasik signifika sistema moris komunidade nia sempre iha mudansa ohin hakarak ida ne’e no aban harakak ida ne’eba, nune’e mos iha implikasaun ba involvimentu grupu iha hala’o viazen no fornese meius fasilidade no seluk tan, atu bele hakontente vizitor sira iha momentu sira nia vizita ne’e.

Se ita ko’alia konaba dezenvolvimentu rai laran iha kontestu turismu komunitariu maka ita sei liga ho assuntu importante sira ne’ebe maka relevante ho dezenvolvimentu komunitariu maka hanesan ita iha esperansa bo’ot iha kapasidade atu apoia hodi aumenta bein estar komunidade sira nian liu husi “Dezenvolvimentu turismu ho baze komunidade iha lian Ingles “Community Based Tourism Development”, entaun husi buat hirak ne’e ita  tenki iha mudansa paradigma dezenvolvimentu ne’ebe maka hatu’ur komunidade sira nudar sujeitu ba dezenvolvimentu, wainhira komunidade sira iha potensia atu sai autor ba iha esforsu turismu nian. Iha dalen seluk, tau programa sira hodi empoderiza komunidade sira liu husi esforsu aumenta kapasidade, no involve ativu komunidade sira iha dezenvolvimentu Tourismu, situasaun hirak ne’e relasiona ho impaktu ba seitor ekonomia oinsa atu kria empregu no hasa’e rendimentu komunidade nian. Alende empoderiza komunidade iha dezenvolvimentu seitor turismu assuntu importante sira ne’e hanesan fo konesementu liu husi formasaun  nudar dalan ida ba hasa’e kapasibilidade intelejensia komunidade iha prevensaun pobreza liu husi esforsu turismu, bele mos konstrui konsiensia no partisipa ativu komunidade atu kria iklima ne’ebe kondusivu ba dezenvolve turismu, inklui mos motiva involvimentu no servisu entre Stakeholder iha dezenvolvimentu area Tourism ni-nian”, (Fontes: http://caretourism.wordpress.com/2010/11/05/membangun-kepariwisataan-indonesia-berbasis-komunitas/.

Tarjeitu ne’ebe ita atu atinje iha hala’o prosesu programa empoderizasaun, mak iha final sei iha nia progresu hanesan komunidade asesu ba rekursu kapital/modal, abilidade, konesementu, teknolozia no kompetensia atu produz inklui relasiona ho fatin turismu ne’ebe maka eziste, ikus mai komunidade maka sai na’in no sei hetan rahun diak iha dezenvolvimentu seitor turismu ne’e rasik. Se ita mak sai turista ida ho ita nia prezensa iha fatin importante turistiku hirak ne’e signifika ita ativamente ba apoia dezenvolvimentu nomos ezemplar ida ne’ebe mak diak duni ba komunidade sira iha momentu ida ne’e mak atrai ona ema seluk nia hakarak atu investe motivasaun ida hodi halo viazen, maibe prinsipal liu maka iha parte ida husi atividade viazen ne’e oinsa komunidade lokal sira bele kontente housi prezensa traveller sira nian iha fatin refere nomos investe traveller sira nian hanoin fresku hafoin se’es husi atividade servisu ne’ebe rutina sira halo.

4. KONSIDERASAUN FINAL

Fatin Turismu ne’ebe eziste iha nasaun Timor Leste ita presiza fo enfaze ho ita nia kontribuisaun tomak hodi sai mata dalan no ita mos tenki empena ita nia posibilidade hotu atu dezenvolve diak liu tan ba seitor turismu ne’ebe moris ona no sai bo’ot hafoin ita ukun-an, no turismu hanesan industria bo’ot ida ne’ebe hamri’ik ho nia importansia ba aumenta rendimentu ba ita nia nasaun iha prosesu dezenvolvimentu nia laran, turismu iha parte ida atu introduz arte de kultura no natureza furak ba emar sira ne’ebe nia ezistensia iha rejiaun, kontinente, teritoriu ou nasaun ida ba nasaun seluk atu ba halo viazen iha fatin refere.

Enkorajamentu traveller nian iha hala’o atividade viazen ba fatin turistiku atu emprega sira-an iha atividade  ho lisan la hetan kompezasaun ruma no iha prinsipiu ida atu hakontente ita-an, nune’e mos husik hela rezidensia eh fatin permanente hodi ba fatin furak sira ho provizoriamente durante 24 oras nia laran, atu bele iha aprosimasaun mutual diak liu tan ho natureza hanesan nesesidade ne’ebe iha ligasaun ho matenek na’in nia balun hanoin konaba; atu passa ferias no rekreasaun, edukasaun no peskiza, relijiaun, nesesidade saude, Interese  arte no kultura nian, Seguransa, vizita familia, politika.

Enkorajamentu turistas sira nian iha hala’o viazen nudar savi ba dezenvolvimentu ekonomia ba domestiku nasaun nian.

Bibliografia;

Fontes husi; Livru Introdusaun Siensia Turismu (Pengantar Ilmu Pariwisata), cetakan pertama tahun 1996 (Revisi), Drs. H. Oka A. Yoeti, MBA, penerbit ANGKASA Bandung-Indonesia,

Fontes husi; internet, http/www.google.com, info access iha loron 13 Septembru 2014, 10:23 Otl, Caicoli-Dili.

http://caretourism.wordpress.com/2010/11/05/membangun-kepariwisataan-indonesia-berbasis-komunitas.

Copia edit..........................foin aprende hakerek ida ne'e husu belun sira nia opiniaun no kretiku....obrigado